غرد النائب هاكوب ترزيان عبر “تويتر”: “كل ما بقول بلاها خليني ساكت، تعميم ورا تعميم. اليوم، تعميم جديد رقمه 601 وسعر جديد حسب الموسم 8000 ل.ل حتى فرانكلين زاغوا عيونو ومنو مصدق لأن أكيد في أسباب علمية للموضوع، هو ونحنا مش فاهمين”.
أضاف: “بدي ذكر يللي ذاكرتو قصيرة، نحنا ببلد اقتصاده حر حق، كل شخص سحب أمواله كما يشاء وبالكمية التي يشاء وبحسب العملة يلي حسابو مسجل فيها لدى المصارف، بلاها خليني اليوم ساكت عن هل تعميم لانو السوق السودا حدا عم يديرها وحزروا انتو مين وخبروني”.
وتابع: “خليني احكي عن التعميم رقم 568 يلي تم تقديم الطعن فيه من قبل جمعية الصناعيين في 23 تشرين الأول سنة 2020 في مجلس الشورى، ويلي بيلزم الشركات بدفع قروضهن بعملة العقد بين المؤسسة التجارية والمصرف، وبقية القروض تستوفيها المصارف بالليرة اللبنانية، ولليوم ما في جواب”.
وأردف: “غريب، شو المطلوب نحمي المصارف على حساب بقية القطاعات ونأفلسها، الشركات تستوفي ديونها بالليرة وعلى سعر الصرف الرسمي 1507,5 والمصارف بالعملة غير اللبنانية، كيف فيها تستمر هل المؤسسات في كل القطاعات، وعندها آلاف الموظفين. شو المطلوب نأفلس كل المؤسسات؟ الكل لازم يستوفوا قروضهم بالليرة وعلى السعر الرسمي من دون أي استثناءات”.
وختم: “العملة الوطنية هي عملة الابراء، المطلوب البت بهذا الطعن وبسرعة، ليش عم يتأخر مجلس الشورى عن البت بهالطعن؟ لازم نحمي كل القطاعات والأفراد وبحسب القوانين والدستور”.
