وفي جمهورية المافيا والميليشيا:
شعبٌ لا يستحق الرثاء !

….ممكن نرجع بالتاريخ لشباط ٢٠٠٥؟
مش راح طالب منكم نرجع بالتاريخ كتير رجوع لأن ببساطة نحنا شعب وقته ثمين كتير، اذا بدو يقرأ بيتطّلع بالعنوان والصورة، اذا بدو يسمع اخبار بتكون فقط استراحة محارب الساعة ٨.

….ليه بدي ارجع لشباط ٢٠٠٥؟
مع اغتيال الشهيد رفيق الحريري، قلت الله يساعد لبنان واللبنانيين لأن نقطة انطلاق مشروع حزب الله الايراني في وطن شهد ما شهد من اغتيالات جرائم..احتلالات..حروب ودون حسيب ولا حتى رقيب.

….نعم، نحنا شعب لا يستحق الرثاء!
هيدا الشعب اللي قطع عليه تاريخ وضل صامد بوجه كل انواع الظلم من الخارج والداخل ومن زعماؤه قبل اي احد، لا يزال حتى الساعة يسأل بأي ذَنبٍ أُحاسَب؟!

….نعم، نحنا شعب لا يستحق الرثاء!
١٨ طائفة تعاني في مساحة ١٠٤٥٢، ويعيش بحقنة مخدّرة لتسكين وجعه كي لا نعود لحرب ال ٧٥ تحت شعار العيش المشترك والسّلم الاهلي والتعايش لأن ارض التنوع تميّزنا!

….نعم، نحنا شعب لا يستحق الرثاء!
صحيح المباني ترمّمت، بس رجعت انفجرت
لا شارع مقابل شارع، انما سلاح بوجه اللبناني
لا رصاص وراجمات، انما اذلال وتفقير وتجويع
لا خطف عالهوية، انما عم يلغولنا الهوية

….نعم، نحنا شعب لا يستحق الرثاء!
زعماء الطوائف كيف حكموا كل هالسنين؟
الفاسدين والحرامية مين رجعهن عالحكم؟
بكل انتخابات ليه ما عندك جرأة التغيير؟
من شو بتخاف؟
من الجوع؟ انت جوعان
من الموت؟ ما انت جثة متنقلة
من قطع رزقك؟ وين رزقك اليوم
خايف على طائفتك؟ طيب ولبنان؟

….نعم، نحنا شعب لا يستحق الرثاء!
نحنا ببساطة شعب سكران انه العيّيش،
شعب من عز الازمة اخترع قطاعات عمل،
بأزمة المصارف والدولار، اللبناني صار صرّاف
بأزمة الدوا، اللبناني صار تاجر ادوية
بأزمة البنزين، اللبناني صار يخزّن

….نعم، نحنا شعب لا يستحق الرثاء!
بعزّ ثورة تشرين، قسم من الشعب صاروا نجوم.
بعزّ ازمة وجود لبنان كوطن، صار عندك محللين سياسة، نجوم مساحات، خبير توقّع اقليمي، منظّر عالناس، تذاكي على بعض، ولكل واحد غاية وهدف.

….نعم، نحنا شعب لا يستحق الرثاء!
لما بتعتبر انتقاد زعيمك تقليل من قيمته
لما تنسى تطالب زعيمك بوعوده الانتخابية
لما ينشدّ عصبك الطائفي برفّة جفن
لما ما تجرّب تسمع واذا قبلت تحاور بتخوّن
….نعم، نحنا شعب لا يستحق الرثاء!

زعلتوا من حقيقة كلماتي ما هيك؟
ما انا من هيدا الشعب المسكين!
زعلتوا من طرح العلّة متل ما هيي؟
معليش ازعلوا علنا نتّعظ من تاريخنا!

ايه نعم، نحنا شعب لا يستحق الرثاء!

لأن الشعب اللي دفن الضحايا ونهض
اكتفى بنُصب تذكاري للضحايا، للذكرى!

لأن الشعب الساكت صارلوا سنين…
فكّر يتّحد وينزل امام المجلس النيابي؟
فكّر يصرخ بصوت واحد حزب الله الايراني ارهابي؟
فكّر بصفر خوف يقول حزب السلاح الايراني قتل رفيق بيروت وشهداء ثورة الارز ولقمان وجو واجتاح مناطق وفجّر عاصمتنا؟
فكّر يطالب نوابه بقبع السلاح بالقرارات الدولية، وتطبيق الطائف؟
لأن ما في فراغ بالحكم فالحكم للسلاح!

كرمال كل اللي راحوا
كرمال وطن عم تطلع روحه
كرمال ارض ارتوت دم
كرمال هوية عم يدفعوا حقها ليتجنسوا
كرمال ثقافة القلم والحرف والكلمة والأرز
كرمال ثقافة موسيقى وديع صباح وفيروز
كرمال ثقافة سعيد عقل وجبران خليل جبران

ازعلوا مني…..علّنا نصبح يوماً
‘شعب يستحق الرثاء’ 🇱🇧