كتبت الإعلامية سامية خداج :
بقلمي،
بفكري،
بحرّيتي،
بوطنيّتي،
صار وقت أنا دِقّ ناقوس الخطر، ايه ايه الخطر!
مقال وقرّرت اكتبوا بلغة الناس،
بحروف مبعثرة متلنا تماماً ولعيون الناس.
لزعماء الطوائف او المسؤولين الباهتين،
للإعلام للفنان للرياضي للممثل،
لولاد البلد وللبلد،
رسالة اعتبروها ناقوس خطر، ايه ايه خطر.
هنّي بيموتوا بالتاريخ وبالتحديد تاريخن،
على اساس شو بيشرف تاريخك يا بطل الابطال،
تاريخ صوته مدفع، عمالة، حروب، ملاجيء، وريحته دم ابرياء، ونفوس معفّنة، هيك رضيت عظمة غرورهم.
شو بتريدوا يا سياسيي البلد؟
حروب عملتوا، مبايعة بعتوا، عنتريات عنترتوا، بلد قسّمتوا، مناطق رسّمتوا، زعماء تزعّمتوا، طوائف الناس شحنتوا، سلم اهلي وتعايش وعيش مشترك حروف مرتبة بس كذّبتوا، استفادة استفدتوا، سرقات سرقتوا، صفقات ما قصّرتوا والأنكى تعب بعد ما تعبتوا.
شهيد ورا شهيد تعملوا تسوية على جثثهم بالارض، قال شو؟ نفوس معبّاية منقطّع مرحلة لوصلنا للانتخابات.ولأنكن أبلَس من ابليس، عرفتوا شو قاهر الناس، واستغلّيتوا رفضهن لسيطرة حزب الله عالبلد وعالعدالة، فا مشيتوا بشعارات ضد السلاح وارجعتوا نواب ودخل معكن ١٣ نائب موظفين عند حضراتكن وبلّش مشوارنا الجديد وخيبة ورا خيبة.
من هون ضروري وضّح، التعميم خطأ، فالسرد الجايي كل معتوه منكن راح يقول ايه هيدا انا المعتوه.
مش كل حدا بالمعارضة اليوم هوي معارض للسلاح، ومش كل حدا قال انا سيادي هو فهمان شو السيادة. عندك السيادي المحاصر الادمي اللي بدو يحترم القانون والدستور حتى ونحنا في مين مغتصب الدولة والدستور. وعندك السيادي الخايف يرفع الصوت من كاتم الصوت (ايه حبيبي لان انت جايي على مهرجان الرمان مش مواجهة اللي بيحشي رمان)، وعندك مجموعة شتل وزريعة حبق من اللي منتفضين عكل شي بس من ومع كل شي، وعندك السيادي عالقطعة اللي عطول بياخد بعين الاعتبار الوفا لصديق التاريخ المعفّن وبيقلك الحوار مع حزب السلاح ضروري بس سيادي، وكمان بيرفض ١٥٥٩ بس سيادي، وبيقلك بدي اصلاحات والناس عايشة بالقلة وكأن سلاح واصلاح بيلتقوا تحت سما انفجارها موقوت بأمرهن.
وعندك نواب المحور الايراني، اللي لو اختلفوا بس بالسر ومشروعن واضح وعم ينفذوه والمعارض الن شاهد بس ما شايف شي.
شاغلين حاالن كلن يعني كلن كل خميس لانتخاب رئيس، عنجد بدكن رئيس؟ عنجد الحل رئيس؟ ليه عجبكن عون بمسرحية الناطور والحاكم الايراني؟ حبيتوا العرض؟ بدكن كمان ٦ سنين عروض؟
شو بدي بالرئيس…
انتو كيف بتسكتو للنبيه يلي عم ينظّر عليكن يا سياديين بكل جلسة، ومستخف فيكن وهالشي بيعني مستخف بشعبكن انتو، ليه ما تركتوا الجلسات عند اول ما سمعتوا مادي اجرها من الشباك؟ليه ما بتقاطعوا اصلا وانتو عارفين من بكرا حزب الله بيوصّل ناطور ايراني ثاني وفي بيناتكن اللي قلبه مسامح كريم وبيرضي الحزب والحركة عند اللزوم؟اصلا تأخرتو. كان لازم بس انرفض نقاش الترسيم بمدرسة الناظر النبيه تحملوا حالكن وتقاطعوا رافضين الاستخفاف!
بس احلى شي انكن تركتوا ميشال عون لليوم، بلا حساب عالخيانة، وبدل ما يطم حاله تحت تاسع ارض بعده بيستنكر اجتماع حكومة…ما بستغرب ضعفكم وخوفكم من اي خطوة واللي فرعن حزب الله عبر تسويات كل هالسنين هو اللي اليوم عم يخلّي عون كمان يفظع بالبلد بانتاج العاق باسيل.
شو بتريدوا يا اعلاميي البلد؟
نازلين فينا نظريات بالوطنية وتحليلات وتقييم عهيدا عميل وهيدا خاين وهيدا بيبقبض وانتو تحديدا يلي سألتوا عن الحمار اللي سمح بتخزين نيترات بنص عاصمة عم تفتحوا الهوا لتجمعوا اخصام واضداد وتبلّش حفلة الجنون….كرمال شو؟ كم ليرة؟ والناس؟ الناس وين من المعادلة؟
يا فنان يا ممثل يا رياضي وينكن؟
في مين عم يحكي وبيسجل مواقف بس وينكن من مهزلة النواب كلن؟ ليه ما بشوفكن متحدين؟ ليه ما بتجتمعوا يا مثقفي البلد بمؤتمر طالبين من العالم العربي والدولي نزع السلاح لنقدر نبني دولة محاسبة وقانون؟ او ناطرين الدفع للتحرك؟
يا ولاد البلد وينكن؟
لوين رايحين؟
غلطتنا ما فجرنا حقدنا عند اول ضحية
غلطتنا مقسومين عدة شعوب عأرض وحدة
غلطتنا دفنّا الضحايا ونهضنا قال
ما بدي تثوروا لان بلا قرار بحل من مجتمع دولي نتيجة ما في، بس ليه ما كل حدا بيضغط عنوابه؟ ليه ما منلاقيهن الخميس منمنعن من دخول الجلسة ومنقول تحت السلاح ما بدنا رئيس، ليه؟ معجوقين ايه؟ طبعاً بدنا نرد عالمعتوهين متل بولا والزغبي العوني وكم قلعوط عم تعطوه قيمة بردودكم.
وهلّق لوين؟
صار وقت انا دق ناقوس الخطر !
نحنا ما عم نواجه خصم سياسي عادي،
نحنا معارضة لمحور ارهابي وقح عم يتفرعن.
فالسياسة الناعمة مرفوضة
متل ما حضرتوا بيهدد، اتفضلوا هددوه
متل ما حضرته بيرشح واحد معاقب وواحد ما معو شهادة مدرسية، اتفضلوا افرضوا صاحب اكبر تمثيل مسيحي كمرشح للرئاسة، وايه عم بعني سمير جعجع، واللي بيقلك استفزازي وما بيجمع، قلّه هيدا الموجود اللي عم يواجه ويدافع عن لبنان واللي مش عاجبه يشرف يصف بمدرسة النبيه وحسن. سمير جعجع هوي المرشح بعد ما أمروا اللامركزية مرفوضة وبدن مرشح يحمي المقاومة التجليطة.
يا حضرات نواب مشروع لبنان
ما بدنا رئيس اليوم لأن ما شي راح يتغير هيدا اذا ما اغتالوه!
المطلوب نواجه
والمواجهة بس بتعمل تغيير
قاطعوا الجلسات
حاسبوا عون لترجع الفخامة للمركز الماروني،
اجمعوا الجبهات السيادية مع الاعلاميين والفنانين والكتاب والمثقفين ورجال الاعمال تحت جبهة وطنية مهتمها كتاب للمجتمع العربي والمجتمع الدولي تعلنون اننا رهائن سلاح الايراني ولبنان محتل ومؤسساته مفككة وكيانه عم يذوب بالمشروع الايراني وطالبوا بتطبيق القرارات الدولية ووضع لبنان بصفته محتل منكوب تحت وصاية دولية.
اللي بيخوفكن من حرب قل له هيدا مصير بلد
اللي بيقلك منعمل حوار داخلي قل له حل عن سمانا
اللي بيقلك بيغتالونا دمنا مش اغلى من اللي راحوا
اللي بيقلك منتوافق بالوسط ارضاء للجميع، شو بتقول؟
السلاح بدو سلاح واللي بيتاخد بالقوة منرجعوا بالقوة
غير هيك راح نصير نازحين مشتتين ببلاد الله الواسعة
ورسالتي اليوم لقول:
انا ما بدي بديل عن لبنان
وفشرتوا اعطيهن ارض وثقافة وهوية
غير هيك منكون كلنا قرطة خونة وبدنا حريق!
واذا اغتالونا ممنوع تدفنونا وتنهضوا
اتركونا بالأرض وعالأرض…هيك ريحة الدم بتعطي قوة
واتذكر،
اللي بيخاف…بيموت
ايه بيموت..من الخوف!
